--------------------------------------------------------------------------------
روحك
إجت روحك عليه وتشكي منك حيل
وأجت جابت عذاب ومنك الونه
لتحاول تمن روحك تراك اتعيل
تمن روحك عليك اتشيلك المنه
موزين ابجعبتك أنته عندك روح
وگلب عندك حنين ويسمع اشغنه
********************
من زغرك غريب وخلگك اصغر شي
وتفل دوم الجروح ألمارضت تشفه
ومامدهه السوالف حلوه تطبع بيك
لاأن بيك الحزن صاير شبه حرفه
أوگفلي عجل إسمع نصيحة شاب
طلع چف البحر حط سره نص چفه
********************
لو تگبل عليه إبحوشي كوم احضان
تضم بيك الفرح ألما تطگ افراح
وتبان الحقيقه إبطبعك انته اشلون
خجل عين وحياء وكلك انته ارواح
بنه بيته الحنان وسوه منك باب
وقفل بابه وبديك مأمن المفتاح
*******************
جازيتك عجب ترجع ترد بذات
ولك جازي الجزاك ابشوفة أعيونك
ماتگدر تواصل گلي أحنه انجيك
أثر روحي ودليلي الوالله حبونك
مر بيه القهر حد الجفن بدموع
جزاك الله شفتني ابثورة اضنونك
*******************
لاترجع تعال ابصدري اضمك حيل
أذن أني الحنون وأنته من يقسه
سامحتك شسوي ابضلي ماكو اعيون
تشوف احد ورايه إيخون بالخلسه
وفكر عيني عليك اشون راح الگاك
مثل أول بشوش وگعدتك ونسه
******************
لو وجهك هذاك ألمارحمني أبيوم
لو هذا الاكرهه ودومي اصد عنه
ياربي الهدايه وانته تدري اشلون
عذبني وغصب شوفني موجنه
ماريدك تعذبه وبيه ذكره اهواي
وإذا راح ونساني ارجوك بس فطنه
تحياتي
السبت أغسطس 22, 2009 7:05 pm
